उदयपुर । उदयपुरको उदयपुरगढी गाउँपालिका वडा नम्बर १ शिखरपुरमा आइतबार आगलागीमा एकको मृत्यु भएको छ, भने ७ घर जलेर नष्ट भएका छन् ।
आगलागीमा परी ६८ वर्षिय शिवमाया मगरको घटनास्थलमै ज्यान गएको स्थानीय राजन खत्रीले बताउनु भएको छ । उहाँका अनुसार स्थानीय ओमबहादुर मगरको घरबाट एक्कासी आगलागी सुरु भएको र आगलागीमा परी ओमबहादुरको आमा शिवमायाको ज्यान गएको उनको भनाइ छ ।
आँखा नदेख्ने ,कान पनि नसुन्ने शिवमायाको घरभित्रै जलेर ज्यान गएको हो । आगलागीमा परी भैरबबहादुर ग्राङ्जामगर , पदमबहादुर ग्राङ्जामगर, यम्बरबहादुर ग्राङ्जामगर, दिपबहादुर ग्राङ्जामगर, धनमाया ग्राङ्जामगर, शेरबहादुर ग्राङ्जामगर र ओमबहादुर ग्राङ्जामगरको घरगोठ जलेर नष्ट भएको छ ।
आगलागीमा पत्येक घरपरिवारको दर्जनबढी बोका , बाख्रा, सुंगुर, कुखुरा जलेर नष्ट भएको छ । अन्नपात, लत्ताकपडा सवै जलेका छन् । स्थानीयका अनुसार उदयपुरगढीबाट प्रहरी आएर अनुसन्धान सुरु गरेका छन् । स्थानीयले अन्दाजी १ करोडबढीको क्षति भएको हुन सक्ने अनुमान गरेका छन् ।
आगलागी नियन्त्रणका लागि साँझ सम्म ट्याक्टरबाट पानी ल्याउने र निभाउने क्रम जारी रहेको छ । आगलागीबाट छिमेकीघरहरु बचाउन सकिएपनि ७ घरको पूर्ण रुपमा क्षति भएको स्थानीयले बताएका छन् । घटनाका बारेमा थप जानकारी आउन बाँकी रहेको छ ।
